Организацијата на потрошувачи бара да се замрзнат цените на основните производи

Замрзнување на цените за да се спречи поскапување, бара Организацијата за заштита на потрошувачите. Пристапот до основните прехранбени производи велат дека е елементарно човеково право, а со сегашните цени ретко кој може да си ги дозволи.

Затоа бараат Комсијата за заштита на конкуренцијата да реагира и да провери, дали трговците се здружуваат и ги качуваат цените, на товар на граѓаните.

– Знаеме дека замрзнувањето на цените е популистичка мерка и дека имаме пазарна економија, но во вакви ситуации не треба да се чека, треба да се излезе со точна проценка и да се преземат мерки зашто се оди на товар и на штета на потрошувачот. За основните намирници мислам дека не треба ни да се зборува. Поради високите цени, многу граѓани купуваат производи со помал квалитет или со помала нутритивна вредност, а пристапот до основните прехранбени производи е елементарно човеково право. Потрошувачот мора да има пристап до основните потрошувачки добра, особено храната – млеко, сирење, путер… –изјави Маријана Лончар Велкова, ОПМ.

Вчера и министерот за економија Бектеши ја повика Антимонополска комисија да излезе на терен и да провери – по кој основ растат цените. Незадоволен што во моментов Комисјата е само нем набњудувач, без ниту една претставка, најави дека ќе се менува законот, со кој повеќе ингеренции ќе има Државниот пазарен Инспекторат.

Во моментов од ДПИ велат дека не е во нивна надлежност да проверуваат зошто растат цените, но прават анализи и по консултации со Министерство за економија, најверојатно ќе бидат овластени и за тоа.

Од Комисијата за заштита на конкуренцијата, по обвинувањата дека не работат ништо, најавија дека ќе се произнесат утре.